Rəhman və Rəhim Allahın adı ilə.

Həmd-səna əvvəl olan Allaha məxsusdur ki, yaratmaqdan və diriltməkdən qabaqdır;

axır olan Allaha (məxsusudur) ki, hər şey fani olduqdan sonradır;

alim olan (Allaha məxsusdur) ki, Onu yad edəni unutmur,

Ona şükür edəndən (nemətini) əskiltmir,

Onu çağıranı naümid etmir,

Ona ümid bağlayanın ümidini qırmır.

Ey Allahım, mən Səni şahid tuturam

və Sənin şahidliyin yetər,

və Sənin bütün mələklərini şahid tuturam,

səmalarının sakinlərini

və ərşini daşıyanları,

göndərdiyin peyğəmbərləri və elçiləri,

və yaratdığın bütün məxluqatı şahid tuturam,

və şəhadət verirəm ki, Sən o Allahsan,

Səndən qeyri İlah yoxdur, yeganəsən,

şərikin, tayın-bərabərin yoxdur,

sözünə xilaf çıxmaz və onu dəyişməzsən;

(həmçinin şəhadət verirəm ki,) Məhəmməd – Allahın salamı olsun ona və xanidanına – Sənin bəndən və elçindir,

o, bəndələrə çatdırmaq üçün ona tapşırdıqlarını çatdırdı,

izzətli və cəlalətli Allah yolunda layiqincə cihad etdi,

haqq olan savabı müjdə verdi,

haqq olan əzab ilə qorxutdu.

Ey Allahım, nə qədər ki sağam, məni Öz dinində sabitqədəm et,

məni hidayət etdikdən sonra qəlbimi azdırma,

Öz tərəfindən mənə rəhmət bəxş et,

həqiqətən Sən çox bəxş edənsən;

Məhəmmədə və Ali-Məhəmmədə salam göndər,

məni onun davamçılarından və ardıcıllarından qərar ver,

məni onun zümrəsində məhşur et,

cümə günlərində vacib əməlləri yerinə yetirməyə müvəffəq et,

və mənə onda vacib etdiyin itaətlərə,

və Qiyamət günü cümə əhlinə qismət etdiyin bəxşişə (müvəffəq et),

cəza günündə,

həqiqətən Sən izzət və hikmət sahibisən.