Ey Allahım, bu, ramazan ayıdır:

Quranı bu ayda nazil etmisən,

insanları hidayət edən, hidayət dəlillərini özündə ehtiva edən və haqqı batildən ayıran;

bu, orucluq ayıdır;

bu, qiyam ayıdır;

bu, qayıdış ayıdır;

bu, tövbə ayıdır;

bu, məğfirət və rəhmət ayıdır;

bu, oddan qurtulmaq və Cənnətə çatmaq ayıdır;

bu, Qədr gecəsinin olduğu aydır:

o gecə ki, min aydan üstündür.

Ey Allahım, Məhəmmədə və Ali-Məhəmmədə salam göndər,

bu ayın orucunu tutmaq və gecələrini ibadət etməkdə mənə kömək et,

bu ayı mənim üçün salamat et və bu ayda məni salamat et,

bu ayda mənə ən yaxşı şəkildə kömək et,

bu ayda məni Sənə itaət etməyə, Sənin elçinə və övliyalarına itaət etməyə müvəffəq et,

Allahın salamı olsun onlara,

bu ayda Sənə ibadət və dua etmək, Sənin Kitabını tilavət etmək üçün vaxtımı asudə et,

bu ayda mənim üçün bərəkəti artır,

bu ayda salamatlığımı daha da yaxşılaşdır,

bu ayda bədənimi sağlam et,

bu ayda ruzimə vüsət ver,

bu ayda məni qəmləndirən işlərə kifayət et,

bu ayda duamı qəbul et,

məni arzuma çatdır.

Ey Allahım, Məhəmmədə və Ali-Məhəmmədə salam göndər,

bu ayda mürgüləməyi, yorğunluğu, darıxmağı məndən uzaqlaşdır,

süstlüyü, rəhimsizliyi, qəfləti, səhlənkarlığı,

bu ayda ağrıları, xəstəlikləri,

qüssələri, kədərləri məndən uzaq et,

hadisələri, naxoşluqları,

səhvləri, günahları,

bu ayda pis olan hər şeyi, əxlaqsızlığı,

əzab-əziyyəti, giriftarlığı,

yorğunluğu, zəhməti məndən uzaq et,

çünki Sən duaları eşidənsən.

Ey Allahım, Məhəmmədə və Ali-Məhəmmədə salam göndər,

bu ayda mənə qovulmuş şeytandan pənah ver,

onun eyib axtarmaq və dalda danışmağından, üfürmək və nüfuz etməyindən,

vəsvəsə etmək və çəkindirməyindən, zülm, hiylə və məkrindən,

tələlərindən və aldatmağından, arzularından,

qəflətə salmağından, fitnə və tələlərindən, dəstə və ardıcıllarından,

dostlarından, yavərlərindən və onunla əlbir olanlardan,

bütün məkrlərindən mənə pənah ver.

Ey Allahım, Məhəmmədə və Ali-Məhəmmədə salam göndər

və ruzi et bizə onun gecə ibadətini və orucunu,

bu ayda və onun gecə ibadətində arzuya çatmağı,

Səni məndən razı salan şeylərin kamilləşməsini,

səbir, razılıq, imanı və yəqinimi,

sonra bunları neçə bərabər və böyük savabla məndən qəbul et,

böyük savabla

ey aləmlərin Rəbbi.

Ey Allahım, Məhəmmədə və Ali-Məhəmmədə salam göndər,

ruzi et mənə həcc və ümrəni,

çalışmağı, səy göstərməyi,

qüvvəni və həvəsi,

günahdan qayıdışı və tövbəni,

müvəffəqiyyəti, yaxın olmağı,

yaxşı əməllərin qəbul olunmasını, rəğbəti, qorxunu,

yalvarışı və boyun əyməyi,

mehribanlığı, dürüst niyyəti,

doğru danışığı,

Səndən qorxmağı,

Sənə ümid bəsləməyi,

Sənə təvəkkül etməyi,

Sənə etimad etməyi,

haramlardan çəkinməyi:

layiqli danışıq,

qəbul olunmuş səy və zəhmət,

ucalan əməl,

qəbul olunmuş dua ilə yanaşı;

mənimlə bütün bunlar arasında ayrılıq salma,

bir hadisə, xəstəlik,

qəm, qüssə,

naxoşluq, qəflət və unutqanlıq ilə;

əksinə, Səninlə əhd-peyman bağlamağı, Sənin üçün və Sənin yolunda özümü qorumağı,

Sənin haqqına riayət etməyi, Sənin əhd-peymanına və vədənə vəfalı olmağı,

Öz rəhmətinə xatir, ey rəhimlilərin ən rəhimlisi.

Ey Allahım, Məhəmmədə və Ali-Məhəmmədə salam göndər,

bu ayda saleh bəndələrin üçün ayırdığın qismətlərin ən üstününü mənim üçün ayır,

bu ayda müqərrəb dostlarına verdiyin ən üstün şeyi mənə əta et,

rəhmət, məğfirət, mehribanlıq, duanın qəbulu,

əfv, daimi məğfirət, salamatlıq və bağışlanmadan,

oddan azad olmaq və Cənnətə çatmaqdan,

və dünya və axirət xeyrindən.

Ey Allahım, Məhəmmədə və Ali-Məhəmmədə salam göndər,

bu ayda duamı Sənin dərgahına çatmış,

Sənin rəhmət və xeyrini mənə nazil olmuş,

əməlimi qəbul olunmuş,

səyimi qiymətləndirilmiş,

günahımı bağışlanmış qərar ver;

ta bu ayda mənim qismətim daha çox

və bəhrəm daha bol olsun.

Ey Allahım, Məhəmmədə və Ali-Məhəmmədə salam göndər,

bu ayda məni Qədr gecəsini yaşamağa müvəffəq et,

ən üstün tərzdə ki, övliyalarından hər biri üçün bunu bəyənirsən və bu Səni razı edir;

sonra o gecəni mənim üçün min aydan üstün et;

bu gecəyə çatdırdığın və bu gecə ilə girami etdiyin kəslərə ruzi etdiyinin ən üstününü bu gecədə mənə ruzi et;

bu gecədə məni Cəhənnəmdən azad olanlardan,

oddan xilas olanlardan,

Öz məğfirətin və razılığınla məxluqatının xoşbəxtlərindən qərar ver,

ey rəhimlilərin ən rəhimlisi.

Ey Allahım, Məhəmmədə və Ali-Məhəmmədə salam göndər,

bu ayda bizə çalışmağı və səy göstərməyi,

qüvvə və həvəsi,

sevdiyin və razı qaldığın hər şeyi ruzi et.

Ey Allahım, ey şəfəqin və on gecənin, cüt və təkin Rəbbi;

ey ramazan ayının və bu ayda Qurandan nazil etdiyinin Rəbbi;

ey Cəbrailin, Mikailin, İsrafilin, Əzrailin

və bütün müqərrəb mələklərin Rəbbi;

ey İbrahimin və İsmailin,

İshaqın və Yəqubun Rəbbi;

ey Musanın və İsanın,

bütün peyğəmbərlərin və elçilərin Rəbbi;

ey peyğəmbərlərin sonuncusu Məhəmmədin Rəbbi,

Sənin salamın olsun ona və onların hamısına;

Sənin onların üzərində və onların Sənin üzərində olan haqqına xatir,

Sənin böyük haqqına xatir Səndən isətiyirəm ki, ona və onun xanidanına, onların hamısına salam göndərəsən,

mənə mərhəmətlə nəzər qıldığın zaman

onun vasitəsilə məndən razı qalasan; elə bir razılıq ki, ondan sonra əsla mənə qəzəb etməyəsən;

bütün isətklərimi, rəğbətimi, arzu və diləyimi mənə əta edəsən;

xoşlamadığım və yan gəzdiyim,

özüm üçün qorxduğum və qorxmadığım hər şeyi uzaq edəsən,

ailəmdən, mal-mülkümdən, qardaşlarımdan və nəslimdən.

Ey Allahım, günahlarımdan Sənin dərgahına fərar etmişəm, elə isə, biz tövbə edənlərə pənah ver,

biz bağışlanma diləyənlərin tövbəsini qəbul et,

biz pənah gətirənləri bağışla,

və biz pənah axtaranlara pənah ver,

biz tabe olanlara nicat ver,

biz qorxmuşları xar etmə,

biz rəğbətlilərə aman ver,

biz möhtaclara şəfaət et,

bizə əta et, çünki Sən duaları eşidənsən, yaxın və qəbul edənsən.

Ey Allahım, Sən mənim Rəbbimsən və mən Sənin bəndənəm,

bəndənin dilək diləyəcəyi ən layiqli kimsə onun Rəbbidir,

bəndələr kərəm və səxavətdə Sənə bənzər bir kimsədən dilək diləməmişlər.

Ey möhtacların şikayət yeri,

ey rəğbətlilərin ehtiyacının nəhayəti,

ey çarəsizlərin köməyinə çatan,

ey dara düşənlərin səsinə cavab verən,

ey qorxmuşların pənah yeri,

ey dada çağıranların dadına çatan,

ey müstəzəflərin Rəbbi,

ey giriftarların giriftarlığını aradan qaldıran,

ey qəmlilərin qəmini aradan aparan,

ey böyük giriftarlığı aradan qaldıran,

ey Allah, ey Rəhman, ey Rəhim,

ey rəhimlilərin ən rəhimlisi!

Məhəmmədə və Ali-Məhəmmədə salam göndər,

mənim günahlarımı, eyiblərimi bağışla,

pis əməllərimi, zülmlərimi, cinayətlərimi,

özümə qarşı təcavüzkarlığımı,

Öz fəzl və rəhmətindən mənə ruzi ver,

çünki Səndən qeyri kimsə buna malik deyil;

məni əfv et,

mənim keçmiş günahlarımı bağışla,

ömrümün qalan hissəsində məni qoru;

məni, ata-anamı qoru,

övladlarımı, qohumlarımı, ailəmi,

dünya və axirətdə mənimlə eyni yolda olan mömin və möminələri;

çünki bunların hamısı Sənin əlindədir

və Sənin məğfirətin genişdir.

Ey Ağam, məni naümid etmə,

mənim duamı geri qaytarma və əlimi sinəmə qaytarma,

ta bunları mənim üçün yerinə yetir və istəklərimi həyata keçir,

Öz fəzlini mənim üçün artır,

çünki Sən hər şeyə qadirsən

və biz Sənə rəğbət bəsləyirik.

Ey Allahım, gözəl adlar Sənə məxsusdur,

uca örnəklər,

əzəmət və nemətlər,

Səndən adına xatir istəyirəm,

"Rəhman və Rəhim Allahın adı ilə",

əgər bu gecədə müqəddər etmisənsə

mələklərin və Ruhun nazil olmasını,

Məhəmmədə və Ali-Məhəmmədə salam göndər,

adımı səadətlilərin arasında qərar ver,

ruhumu şəhidlərlə birlikdə,

ehsanımı uca məkanda,

və günahımı bağışlanmış;

mənə elə bir yəqin bəxş et ki, daim qəlbimlə birgə olsun,

və elə bir iman bəxş et ki, şəkk-şübhə ona qarışmasın,

mənə qismət etdiyinə razı olmağı mənə bəxş et;

dünya və axirətdə mənə gözəl nemətlər ver,

məni odun əzabından qoru.

Əgər bu gecədə müqəddər etməmisənsə

mələklərin və Ruhun nazil olmasını,

onda məni o vaxtadək qoruyub saxla,

o gecədə Öz zikrini, şükrünü mənə ruzi et,

itaətini və gözəl ibadətini.

Məhəmmədə və Ali-Məhəmmədə salam göndər

ən üstün salamlarını, ey rəhimlilərin ən rəhimlisi,

ey tək, ey ehtiyacsız,

ey Məhəmmədin Rəbbi,

bu gündə Məhəmmədi və onun xanidanından olan yaxşı əməl sahiblərini himayə et,

onların bütün düşmənlərini məhv et,

və onları bir-bir say,

onların heç birini yer üzündə saxlama,

onları əsla bağışlama.

Ey gözəl həmdəm,

ey peyğəmbərlərin xəlifəsi!

Sən rəhimlilərin ən rəhimlisisən,

başlayan və yaradansan,

Sənin bənzərin yoxdur,

qafil olmayan əbədisən,

ölməyən dirisən;

Sən hər gün bir işdəsən;

Sən Məhəmmədin xəlifəsisən,

Məhəmmədin yavərisən,

Məhəmmədi üstün edənsən;

Səndən istəyirəm ki, Məhəmmədin canişininə və xəlifəsinə kömək edəsən,

Məhəmmədin canişinlərindən olan ədalətlə qiyam edənə,

Sənin salamın olsun ona və onlara,

köməyini onlara yönəlt.

Ey o kəs ki, Səndən qeyri ilah yoxdur,

"Səndən qeyri ilah yoxdur" kəlməsinə xatir,

Məhəmmədə və Ali-Məhəmmədə salam göndər,

dünya və axirətdə məni onlarla birlikdə et,

aqibətimi Sənin tərəfindən olan bağışlanma və rəhmət qərar ver,

ey rəhimlilərin ən rəhimlisi.

Ey Ağam, Sən lütfkarlığı Özünə beləcə nisbət vermisən;

bəli, Sən həqiqətən lütfkarsan;

elə isə, Məhəmmədə və Ali-Məhəmmədə salam göndər

və istədiyin xüsusda mənə lütf et.

Ey Allahım, Məhəmmədə və Ali-Məhəmmədə salam göndər,

həcc və ümrəni bu il mənə ruzi et,

bütün axirət və dünya istəklərimi həyata keçirməklə mənə minnət qoy.

Rəbbim olan Allahdan bağışlanma diləyirəm və Ona tövbə edirəm,

həqiqətən mənim Rəbbim yaxındır və icabət edəndir.

Rəbbim olan Allahdan bağışlanma diləyirəm və Ona tövbə edirəm,

həqiqətən mənim Rəbbim rəhimli və mehribandır.

Rəbbim olan Allahdan bağışlanma diləyirəm və Ona tövbə edirəm,

həqiqətən O, çox bağışlayandır.

Ey Allahım, məni bağışla,

həqiqətən Sən rəhimlilərin ən rəhimlisisən.

Ey Rəbbim, mən pis iş görmüş və özümə zülm etmişəm,

elə isə, məni bağışla, həqiqətən Səndən qeyri kimsə günahları bağışlamır.

O Allahdan bağışlanma diləyirəm ki, Ondan qeyri Məbud yoxdur;

O diri, əbədi, səbirli və əzəmətlidir,

kərimdir, böyük günahları bağışlayandır,

mən Ona tövbə edirəm.

Allahdan bağışlanma diləyirəm,

həqiqətən Allah bağışlayan və mehribandır.

Ey Allahım, Səndən istəyirəm ki, Məhəmmədə və Ali-Məhəmmədə salam göndərəsən,

Qədr gecəsində hökm verdiyin və müqəddər etdiyində,

böyük qəti əmrlərdən,

o qəza ki geri götürülmür və dəyişilmir,

məni Öz evinin hacılarından qərar verəsən:

o hacılar ki, həccləri qəbul olunmuş,

səyləri qiymətləndirilmiş,

günahları bağışlanmış

və pis əməllərinin üstü örtülmüşdür.

hökm verdiyin və müqəddər etdiyində ömrümü uzun edəsən,

ruzimi bol edəsən,

əmanətimi və borcumu ödəyəsən;

duamı qəbul et, ey aləmlərin Rəbbi.

Ey Allahım, işimdə bir yol açıqlığı və həll yolu qərar ver,

güman etdiyim və güman etmədiyim yerdən mənə ruzi ver,

qoruduğum və qorumadığım yerdən məni qoru,

Məhəmmədə və Ali-Məhəmmədə saysız salam göndər.