خدایا اے راز کے گواہ،

ہر فریاد کی منزل،

ہر پوشیدہ امر کے جاننے والے،

ہر حاجت کی انتہا،

اے بندوں پر نعمتوں کی ابتدا کرنے والے،

اے بہترین درگذر کرنے والے،

اے عطا والے

اے جواد۔

اے وہ جس سے نہ کوئی اندھیری رات،

نہ کوئی متلاطم سمندر پوشیدہ ہے

نہ کوئی برجوں والا آسمان

اور نہ کوئی انتہائی تاریک ظلمت کسی شئے کو چھپا نہیں سکتی

اس کے سامنے ظلمت بھی روشن ہے

میرا سوال تیری ذاتِ کریم کی نورانیت کے وسیلہ سے ہے

جس کا جلوہ کوہِ طور پر نمایاں کیا جس کی وجہ سے پہاڑ ریزہ ریزہ ہوگیا

اور موسیٰؑ بے ہوش ہوگئے

اور اس اسمِ گرامی کا واسطہ جس کے ذریعہ آسمانوں کو بغیر ستون کے بلند کردیا

اور زمین کو پانی پر ٹھہرا دیا

پھر ان اسماء کا واسطہ جو تیرے خزانے میں مخفی اور لکھا ہوا ہے

اور وہ پاکیزہ نام ہے

کہ جس کے ذریعہ تجھے پکارا جاتا ہے تو قبول کرلیتا ہے

اور مانگا جائے تو تو عطا کردیتا ہے۔

تیرے اس پاکیزہ نام کا واسطہ جو خود ایک برہان ہے

اور ہر نور پر اس سے بالاتر نور ہے

اور ہر نور کا نور ہے

جس سے ہر نور میں نورانیت ہے۔

وہ نور زمین تک پہنچ جائے تو شق ہوجائے

اور اگر آسمان تک پہنچ جائے تو اس کے دروازے کھل جائیں

عرش تک پہنچ جائے تو لرز جائے

اور تیرے اس نام کا واسطہ کہ جس سے ملائکہ کے جوڑ بند ہلتے اور لرزتے ہیں۔

خدایا میرا سوال جبرئیل، میکائیل، اسرافیل

اور حضرت محمد مصطفیٰؐ

حق کے واسطہ سے جن پر تیری رحمت ہے

اور تیری رحمت تمام انبیاء اور تمام ملائکہ پر ہے

اس نام کا واسطہ کہ جس کے ذریعہ خضر دریاؤں کی بلندیوں پر

یوں چلتے تھے جیسے ہموار زمین پر چلتے تھے۔

اس نام کا واسطہ کہ جس کے ذریعہ سے موسیٰؑ کے لیے دریا کو شگافتہ کیا۔

فرعون اور اس کے ساتھیوں کو ڈبوکر

موسیٰؑ اور ان کے ساتھیوں کو بچالیا۔

تیرے اس نام کا واسطہ کہ جس کے ذریعہ سے موسیٰ ابن عمران نے

کوہِ طور کے ایک گوشہ کی طرف سے دعا کی

تو تو نے ان کی دعا کو قبول کرلیا

اور انھیں اپنی محبّت عطا فرمادی۔

تیرے اس نام کا واسطہ کہ جس کے ذریعہ عیسیٰؑ ابن مریم نے مُردوں کو زندہ کیا

اور گہوارے میں گفتگو کی

ہر طرح کے اندھے اور مبروص کو تیرے اذن سے شفا دی۔

تیرے اس نام کا واسطہ جس کے ذریعہ حاملانِ عرش

جبرئیل و میکائیل و اسرافیل

اور تیرے حبیب حضرت محمد صلی اللہ علیہ و آلہٖ

اور تیرے ملائکہ مقرّبین

اور انبیاء و مرسلین

اور زمین و آسمان کے نیک بندوں نے تجھ سے دعا کی ہے۔

تیرے اس نام کا واسطہ جس کے ذریعہ یونس نے اس وقت دعا کی

جب قوم سے ناراض ہوکر چلے اور یہ خیال کیا کہ تو ان پر سختی نہیں کرے گا۔

پھر اس کے بعد تاریکیوں میں دعا کی کہ تیرے علاوہ کوئی خدا نہیں ہے۔ تو پاکیزہ ہے۔

میں ظالموں میں ہوں اور تو نے ان کی دعا قبول کرلی

اور غم سے نجات دے دی

کیوں کہ تو صاحبانِ ایمان کو نجات دیتا ہے۔

اس اسمِ عظیم کا واسطہ کہ جس کے ذریعہ داؤدؑ نے دعا کی

اور سجدہ میں گر پڑے تو تو نے ان کی توبہ قبول کرلی اور ان کو معاف کردیا

اور تیرے اس نام کا واسطہ کہ جس کے ذریعہ فرعون کی زوجہ آسیہ نے دعا کی

اور یہ کہا کہ خدا میرے لیے جنّت میں ایک مکان بنا دے

اور مجھ کو فرعون اور اس کے کاروبار سے نجات دے دے

اور اس ظالم قوم سے مجھ کو بچا لے۔

تو تو نے ان کی دعا قبول کرلی۔

اور تیرے اس نام کا واسطہ جس کے ذریعہ ایوبؑ نے دعا کی جب بلائیں نازل ہوگئیں

تو تو نے عافیت اور اہل و عیال بھی عطا فرمائے

بلکہ اپنی رحمت سے زیادہ ہی عطا فرمایا اور ان کا ذکر عابدین میں کیا

اور تیرے اس نام کا واسطہ سے کہ جن کے ذریعہ سے یعقوبؑ نے دعا کی

تو تو نے ان کی بصارت کو پلٹا دیا اور ان کے نورِ نظر یوسفؑ کو ان سے ملا دیا

اور تیرے اس نام کا واسطہ کہ جس کے ذریعہ سے سلیمانؑ نے دعا کی

تو تو نے ان کو ایسا ملک عطا فرمایا کہ ان کے بعد پھر کسی کو نہیں دیا

بے شک تو سب سے بہتر عطا کرنے والا ہے۔

اور تیرے اس نام کا واسطہ کہ جس کے ذریعہ حضرت محمدؐ کے لیے براق کو مسخّر کیا

درود و سلام ہو ان پر اور ان کی آل پر

جب اعلان کیا پاک ہے وہ ذات جو راتوں رات اپنے بندے کو

مسجد الحرام سے مسجدِ اقصیٰ تک لے گئی

اور ان کا قول کہ پاک ہے وہ ذات جس نے اسے ہمارے لیے مسخر کردیا جب کہ ہم اس پر قابو پانے والے نہیں تھے۔

اور ہم سب پلٹ کر اپنے پروردگار کی بارگاہ میں جانے والے ہیں

اس اسم کا واسطہ جو حضرت جبرئیلؑ حضرت محمد

صلی اللہ علیہ و آلہ پر لے کر نازل ہوئے

اور اس اسم کا واسطہ کہ جس کے ذریعہ حضرت آدمؑ نے دعا کی

تو تو نے ان کی خطاؤں کو معاف کردیا اور ان کو اپنی جنّت میں ساکن کردیا

اور میں تجھ سے سوال کرتا ہوں قرآنِ عظیم کے حق کے واسطہ سے

اور محمدؐ خاتم النبیین کے حق کے واسطہ سے

اور حضرت ابراہیمؑ کے حق کے واسطہ سے

اور روزِ قیامت کے فیصلوں کے حق کے واسطہ سے

اور میزان کے حق کے واسطہ سے جب کہ وہ نصب کی جائے

اور صحف کے واسطہ سے جب کہ وہ منتشر ہوں

اور قلم کے واسطہ سے اور ان کی تحریروں

اور لوح اور اس کی احصائیات کے حق کے واسطہ سے

اور اس نام کے حق کے واسطہ سے جس کو تو نے سرادقِ عرش پر

اور دنیا

اور شمس و قمر کی تخلیق سے دو ہزار سال پہلے لکھ دیا ہے

اور میں گواہی دیتا ہوں کہ اللہ کے علاوہ کوئی خدا نہیں ہے

وہ اکیلا ہے اس کا کوئی شریک نہیں

اور حضرت محمدؐ اس کے بندے اور رسول ہیں

اور ان اسماء کے حوالہ سے سوال کرتا ہوں جو تیرے خزانوں میں مخفی ہیں

جسے تیرے علاوہ

اور کوئی نہیں جانتا

نہ ملک مقرّب

اور نہ نبیِ مرسل

نہ تیرا بندہ مصطفیٰ

اور میرا سوال تیرے اس نام کے وسیلہ سے ہے جس سے تو نے دریاؤں کو شگافتہ کیا ہے

پہاڑوں کو قائم کیا

اور شب و روز کی آمد و رفت قائم کی۔

سورۂ حمد اور قرآنِ عظیم کا واسطہ

کراماً کاتبین کے حق کا واسطہ،

طٰہٰ، یٰسٓ، کٰہٰیٰعٓصٓ کے حق کا واسطہ،

اور حٰمعٓسٓقٓ،

توریت موسیٰؑ

و انجیلِ عیسیٰؑ

و زبورِ داؤدؑ

اور قرآنِ محمدؐ کا واسطہ

درود و سلام ہو ان پر اور ان کی آل پر

اور تمام رسولوں اور باہیاً شراہیاً کے حق کا واسطہ

خدایا میرا سوال ہے اس مناجات کے حق کے واسطہ سے

جو تیرے اور موسیٰؑ کے درمیان ہوئی

کوہِ طور پر

اور میرا سوال ہے اس نام کے واسطہ سے جو تو نے ملک الموت کو تعلیم کیا ہے قبض ارواح کے لیے

اور میرا سوال اس نام کے واسطہ سے جو زیتون کے پتّے

پر لکھا گیا آگ اس کے لیے خاضع ہوگئی

اور تو نے حکم دے دیا کہ آگ ابراہیمؑ کے لیے سرد اور سلامتی بن جا

میرا سوال اس نام کے وسیلہ سے ہے جس کو تو نے سرادق بزرگی و امن پر لکھ دیا ہے

اے وہ کہ جسے کوئی سائل رنجیدہ نہیں کرسکتا

اور کوئی عطا اس کے خزانہ کو کم نہیں کرسکتی۔

اے وہ جس سے فریاد کی جاتی ہے اور پناہ لی جاتی ہے۔

میرا سوال ہے تیرے عرش کی عزّت کے مراکز کے وسیلہ سے

اور تیری کتاب کے انتہائے رحمت کے ذریعہ سے

تیرے اسمِ اعظم

اور ہستیِ اعلیٰ

اور کلماتِ تامّات کے وسیلہ سے

اے پروردگار اے ہواؤں اور اُڑتے ہوئے ذرّات کے مالک

اے آسمان اور اس کے سائبان کے مالک،

اے زمین اور اس کے بارِ گراں کے مالک،

اے شیاطین اور اس کے تمام گمراہوں کے مالک،

اے سمندر اور اس کی روانی کے مالک

ان حقوق کا واسطہ جو تیرے ذمّہ ہیں۔

تیرے ملائکۂ مقرّبین،

روحانیین، کروبیین،

شب و روز تسبیح کرنے والوں کے حق کا واسطہ،

ابراہیم خلیلؑ کے حق کا واسطہ

اور ہر اس ولی کا واسطہ جو صفا و مروہ کے درمیان تجھ سے مناجات کرتا ہے

اور تو اس کی دعا قبول کرلیتا ہے۔

اے قبول کرنے والے میرا سوال ان تمام اسماء اور ان تمام دعاؤں کے وسیلہ سے

یہ ہے کہ ہمارے گذشتہ اور آئندہ گناہوں کو معاف کردے

چاہے ہم اس کا اظہار کریں یا مخفی رکھیں،

نمایاں کریں یا چھپادیں

اور جو کچھ بھی تو جانتا ہے

اس لیے کہ تو ہر شئے پر قادر ہے۔

اپنی رحمت کے وسیلہ سے اے سب سے زیادہ رحم کرنے والے۔

اے ہر مسافر کے محافظ،

ہر تنہا کے مونس،

ہر کمزور کی قوّت،

ہر مظلوم کے مددگار،

ہر محروم کے رازق،

ہر وحشت زدہ کے مونس،

ہر مسافر کے ساتھی،

ہر حاضر کے سہارے،

ہر گناہ و خطا کے بخشنے والے،

ہر فریادی کے فریاد رس۔

ہر نالاں کے رنج کو دور کرنے والے،

تمام رنجیدہ لوگوں کے غم کو زائل کرنے والے

تمام مہموم لوگوں کے ہم کا علاج کرنے والے،

اے آسمان و زمین کے خالق،

اے طلب کرنے والوں کی آخری منزل،

اے مضطرّین کی دعا قبول کرنے والے۔

اے بہترین رحم کرنے والے

اے عالمین کے پروردگار

روزِ قیامت کی جزا دینے والے،

اے بہترین جود کرنے والے،

اے بہترین کرم کرنے والے،

سب سے زیادہ سننے والے،

سب سے زیادہ دیکھنے والے،

سب سے زیادہ قوّت رکھنے والے

ہمارے ان گناہوں کو معاف کردے جو نعمتوں کو بدل دیتے ہیں۔

ان گناہوں کو معاف کردے جو باعثِ ندامت ہوتے ہیں۔

ان گناہوں کو معاف کردے جن سے بیماریاں پیدا ہوتی ہیں۔

ان گناہوں کو معاف کردے جن سے رسوائی حاصل ہوتی ہے۔

ان گناہوں کو معاف کردے جو دعاؤں کو پلٹا دیتے ہیں۔

ان گناہوں کو معاف کردے جو بارش آسمان کو روک دیتے ہیں۔

ان گناہوں کو معاف کردے جو جلدی فنا کا پیغام لاتے ہیں۔

ان گناہوں کو معاف کردے جو شقاوتوں کو کھینچ لاتے ہیں۔

ان گناہوں کو معاف کردے جو ہواؤں کو تاریک کردیتے ہیں۔

ان گناہوں کو معاف کردے جو پردوں کو اُٹھا دیتے ہیں۔

ان گناہوں کو معاف کردے جن کو تیرے علاوہ اور کوئی معاف نہیں کرسکتا۔

ہم سے مخلوقات کے تمام حقوق کو اُٹھالے

اور ہمارے امور میں وسعت اور سہولت اور آسانی عنایت فرما۔

اپنے یقین کو میرے سینے میں داخل فرما

تا کہ میں تیرے علاوہ کسی سے امید نہ رکھوں۔

پروردگار میری حفاظت فرما مجھے عافیت عطا فرما،

دن و رات میں میرے ساتھ

سامنے سے، پیچھے سے،

داہنے سے، بائیں سے،

اوپر سے نیچے سے میری حفاظت فرما۔

اور میرے راستہ کو آسان کردے

اور بہترین طریقہ سے آسان کردے

اور مجھ کو مشکل میں نظر انداز نہ کردینا

اے بہترین ہدایت دینے والے

اور مجھ کو میرے امور میں مجھ پر نہ چھوڑ دینا

اور مجھ کو ہر خوشی عطا فرما دینا

اور میرے اہل کی جانب کامیابی، نجات

اور دنیا و آخرت کے سرور کے عالم میں واپس کرنا

کہ تو ہر چیز پر قادر ہے

اور مجھ کو اپنے فضل کا رزق عطا فرما

اور میرے اوپر اپنے پاکیزہ رزق کو وسیع کردے

اور مجھ کو اپنی اطاعت میں مشغول رکھ

اور مجھ کو اپنے عذاب اور جہنّم سے محفوظ رکھ

اور جب میں مرجاؤں تو مجھ کو اپنی جنّت کی طرف لوٹا دینا اپنی رحمتِ کاملہ سے

خدایا میں تیری پناہ چاہتا ہوں تیری نعمت کے زائل ہونے سے

اور تیری عافیت کے تبدیل ہوجانے سے

اور بلا کے وارد ہونے

اور عذاب کے نازل ہونے سے

اور میں تیری پناہ چاہتا ہوں بلا کی سختی

اور بدبختی کے پانے

اور برے فیصلے

اور دشمنوں کی شماتت

اور ہر اس چیز کے شر سے جو آسمان سے نازل ہوتی ہے

اور ان تمام برائیوں سے جو نازل شدہ کتاب میں ہیں۔

خدایا مجھ کو بُرے لوگوں میں نہ قرار دینا

اور نہ جہنّم والوں میں

اور مجھ کو نیک لوگوں کی صحبت سے محروم نہ کرنا

اور مجھ کو پاکیزہ زندگی عطا کرنا

اور مجھے بہترین موت دینا جو مجھ کو نیک لوگوں سے ملحق کردے

اور مجھ کو انبیاء کی رفاقت میں سچّائی کے مقام پر

اقتدار والے بادشاہ کے دربار میں جگہ عنایت فرما۔

خدایا تیرے ہی لیے حمد ہے تیرے حسنِ امتحان اور حسنِ سلوک کی بناپر

اور تیری ہی حمد ہے اسلام اور سنّت کے اتباع پر

جس طرح تو نے ان کو ہدایت دی ہے اپنے دین کی

اور ان کو اپنی کتاب کی تعلیم دی ہے ہماری بھی ہدایت فرما اور ہم کو بھی تعلیم دے

تیرے لیے حمد ہے تیرے حسنِ امتحان اور حسنِ سلوک پر جو خاص طور پر میرے ساتھ کیا ہے

جس طرح کہ تو نے مجھ کو پیدا کیا تو مجھے بہترین مخلوق بنایا

اور مجھ کو تعلیم دی تو بہترین تعلیم دی

اور ہدایت دی تو بہترین ہدایت دی۔

تیرے ہی لیے حمد ہے تیرے قدیم و جدید انعام پر جو مجھے عنایت کیے ہیں

کہ کتنے ہی غم و الم کو تو نے مجھ سے دور کیا

اور کتنے ہی غم کو تو نے زائل کردیا

اور کتنی ہی تکلیف کو اے میرے سردار تو نے ختم کیا

اور کتنی ہی بلاؤں کو برطرف کیا

اور کتنے ہی عیوب کو چھپا دیا

تو تیری حمد ہے ہر حال میں،

ہر مقام اور ہر زمانہ میں،

سفر اور حضر میں،

موجودہ حال میں اور ہر حال میں۔

خدایا مجھ کو اپنے ان بندوں میں قرار دے دے جو سب سے بہتر نصیب والے ہیں

اس خیر میں جس کو تو آج تقسیم کرے گا

یا جس نقصان کو دور کرے گا

یا جس برائی کو برطرف کرے گا

اور جس بلاء کو دفع کرے گا

یا جس نیکی کو بھیج دے گا

یا جس رحمت کو پھیلا دے گا

یا جس لباسِ عافیت کو پنھادے گا

بے شک تو ہر چیز پر قادر ہے

اور تیرے ہی قبضہ میں آسمانوں اور زمین کا خزانہ ہے،

تو ایک ہے، کریم ہے، عطا کرنے والا ہے

جس سے سوال کرنے والا واپس نہیں لوٹایا جاتا ہے

اور جس سے امید لگانے والا گھاٹا نہیں اُٹھاتا ہے

اور جس کی عطا کم نہیں ہوتی ہے

اور جس کا خزانہ کم نہیں ہوتا ہے

بلکہ زیادتی ہی ہوتی رہتی ہے کثرت اور پاکیزگی

اور عطا و جود میں

مجھ کو اپنے خزانہ سے رزق دے جو فنا نہیں ہوتا ہے

اور اپنی وسیع رحمت سے بھی کہ

بے شک تیری عطا رد کی نہیں جاسکتی ہے

اور تو ہر چیز پر قادر ہے

اپنی رحمت کے سہارے اے سب سے بڑے رحم کرنے والے۔

خدایا اگر کسی نے بھی تیاری کی ہے

یا آمادگی کی ہے یا اہتمام اور انتظام کیا ہے

کسی مخلوق کی بارگاہ میں حاضر ہونے کے لیے

تا کہ اس کے عطیہ اور اس کے جائزہ

و انعام کو حاصل کرلے

تو میں تیری بارگاہ کی طرف تیاری اور اہتمام کے ساتھ حاضر ہورہا ہوں۔

تیری معافی کا امیدوار

اور تیرے جائزہ و انعام کا طلبگار ہوں،

خدایا میری دعاؤں کو ناامید نہ کرنا

تیری بارگاہ میں کوئی سائل نا امید نہیں ہوتا ہے

اور تیری جزا کم نہیں ہوتی ہے۔

میں کسی نیک عمل کے بھروسے

یا کسی مخلوق کی سفارش کے سہارے حاضر نہیں ہوا ہوں

بلکہ میں اپنے نفس کے بارے میں برائی اور گناہوں کا اقرار کرتے ہوئے

اس اعتراف کے ساتھ حاضر ہوا ہوں کہ میرے پاس نہ کوئی دلیل ہے اور نہ کوئی عذر ہے۔

تیری عظیم معافی کا امیدوار ہوں جس کے ذریعہ تو نے

خطاکاروں کو معاف کیا ہے اور

گنہگاروں کا مسلسل بڑے بڑے جرم کرتے رہنا تجھے اس بات سے روک نہیں سکا ہے

کہ تو ان پر مہربانی کرے

اے وہ خدا جس کی رحمت وسیع ہے

اور جس کی مغفرت عظیم ہے۔

اے میرے عظیم، اے میرے بزرگ خدا، اے میرے باعظمت خدا

تیرے غضب کو سوائے تیرے حلم کے کوئی روک نہیں سکتا ہے

اور تیری ناراضگی سے سوائے فریاد کے کوئی بچا نہیں سکتا ہے۔

مجھے اپنی قدرتِ کاملہ سے سکون عطا فرما

جس کے ذریعہ تو مردہ شہروں کو زندہ کرتا ہے

اور مجھے کسی غم سے ہلاک نہ کردینا

یہاں تک کہ تو میری دعا قبول کرلے

اور مجھے اس قبولیت کو دکھلادے مجھے تمام زندگی عافیت کا ذائقہ عطا فرمانا

اور دشمنوں کو طعنے دینے کا موقع نہ دینا،

نہ انھیں میری گردن پر

مسلّط کرنا۔

میرے خدا اگر تونے مجھے گرادیا تو اٹھانے والا کوئی نہیں ہے

اور اگر تونے بلند کردیا تو کوئی مجھے گرا نہیں سکتا ہے۔

اگر تو نے ہلاک کردیا تو کون ہے جو تجھ سے میرے بارے میں سفارش کرے

یا میرے معاملہ کے بارے میں سوال کرے

میں جانتا ہوں کہ تیرے فیصلہ میں کوئی ظلم نہیں ہوتا ہے

اور تیرے عذاب میں جلدی نہیں ہوتی ہے

کہ جلدی وہ کرتا ہے جسے قبضہ سے نکل جانے کا خطرہ ہوتا ہے

اور ظلم وہ کرتا ہے جو خود کمزور ہوتا ہے ۔

تیری ذات ان باتوں سے بہت زیادہ بلند و بالا ہے۔

خدایا میں تیری پناہ چاہتا ہوں مجھے پناہ دے دے۔

میں امان کا طلبگار ہوں مجھے امان دے دے

روزی چاہتا ہوں مجھے روزی عطا فرما۔

میں تجھ پر بھروسہ کرتا ہوں تو میرے لیے کافی ہوجا

میں دشمن کے مقابلہ میں تجھ سے مدد چاہتا ہوں لہٰذا میری مدد فرما۔

میں اعانت کا طلبگار ہوں لہٰذا اعانت فرما

میں تجھ سے استغفار کرتا ہوں لہٰذا مجھے معاف کردے۔

آمین آمین آمین