اَنْتَ اللهُ الَّذِي اسْتَجَبْتَ لِاٰدَمَ وَ حَوَّآءَ حِيْنَ (قَالَا رَبَّنا ظَلَمْنَا اَنْفُسَنَا وَ اِنْ لَمْ تَغْفِرْ لَنا وَ تَرْحَمْنَا لَنَكُوْنَنَّ مِنَ الْخَاسِرِيْنَ)
Ey Allahım, Sən Adəm və Həvvaya cavab verdin, o zaman ki, onlar dedilər: "Ey Rəbbimiz, biz özümüzə zülm etdik, əgər bizi bağışlamasan və bizə rəhm etməsən, ziyana uğrayanlardan olacağıq." Nuh Səni çağırdı və Sən ona cavab verdin, onu və onun yaxınlarını böyük çətinlikdən qurtardın. Nəmrudun odunu dostun İbrahimdən uzaqlaşdırdın, bu odu soyuq və sağlam etdin. Sən Əyyuba cavab verdin, o zaman ki, Sənə ərz etdi: "Ey Rəbbim, mənə çətinlik üz vermişdir, Sən rəhimlilərin ən rəhimlisisən." Sən onun çətinliklərini aradan qaldırdın, ailəsini ona qaytardın, onlarda olanları artırdın, ta ki bu, Sənin tərəfindən bir rəhmət və ağıl sahibləri üçün bir xatırlatma olsun. Sən Yunisə cavab verdin, o zaman ki, o, zülmətlər içində Səni çağıraraq dedi: "Ey Rəbbim, Səndən qeyri İlah yoxdur, Sən pak və münəzzəhsən, mən isə zalımlardanam." Sən də ona qəm-qüssədən nicat verdin. Sən Musa və Harunun istəyinə cavab verdin, belə ki, buyurdun: "Sizin istəyiniz qəbul olundu, elə isə, möhkəm və dözümlü olun." Fironu və onun dəstəsini suda qərq etdin. Davudun günahını (tərki-övla) Öz rəhmətin ilə və ona xatırlatma olsun deyə bağışladın. Sənə təslim olduqdan sonra böyük qurbanlığı İsmailə fəda etdin və İbrahim alnını torpağa qoydu, Sən də onu fərəc və asayiş ilə çağırdın. Zəkəriyya öz ibadətgahında Səni çağırıb məxfiyanə dedi: "Ey Rəbbim, sümüklərim boşalmış və qacalıq şöləsi başımı bürümüşdür, mən heç vaxt Sənə etdiyim duanın qəbul olunmasından məhrum olmamışam." Sən isə dedin: "Onlar bizi qorxu və ümid ilə çağırarlar, daim bizə xüşu halındadırlar." Sən iman gətirib saleh əməl yerinə yetirənlərə cavab verdin, Öz fəzl və kərəmindən onlara artırdın. Elə isə, məni Sənin çağıranların və Sənə rəğbət bəsləyənlərin ən dəyərsizi qərar vermə; onların Sənin üzərində olan haqlarına xatir mənim duamı qəbul et, necə ki, onların dualarını qəbul etdin; Öz paklığınla məni pak et, namaz və duamı gözəl şəkildə qəbul et, qalan ömrümü pak qərar ver, ölümümü xoş və rahat et, mənim varislərimə himayədar ol. Ey Rəbbim, duama xatir məni qoru, nəslimi pak nəsil qərar ver, Öz himayənlə onları himayə et, Öz övliyalarından bəndələrindən hər birinin nəslini himayə etdiyin kimi, Öz rəhmətinə xatir, ey rəhimlilərin ən rəhimlisi. Ey o kəs ki, hər şeyin keşiyini çəkirsən, məxluqatının hər istəyinə cavab verirsən və dilək diləyən hər kəsə yaxınsan; ey o kəs ki, Səndən qeyri İlah yoxdur, Sən diri və daimisən, yeganə və ehtiyacsızsan, doğmayıb və doğulmamısan, Sənin bənzərin və tayın-bərabərin yoxdur; Səndən istəyirəm o adlarına xatir: o adlar ki, onunla səmanı ucaltmısan, yeri açıb döşəmisən, dağları möhkəm etmisən, suları cari etmisən, buludu, günəşi, ayı, ulduzları, gecəni və gündüzü xidmətə qoymusan, bütün məxluqatını yaratmısan; Səndən istəyirəm əzəmətli zatının əzəmətinə xatir: o əzəmət ki, onunla göylər və yer işıqlandı, zülmətlər aydınlaşdı; (Səndən istəyirəm ki,) Məhəmmədə və Ali-Məhəmmədə salam göndərəsən, dünya və axirətimə kifayət edəsən, bütün işlərimi yoluna qoyasan, məni bir göz qırpımı qədər öz başıma buraxmayasan, mənim və ailəmin işini islah edəsən (yoluna qoyasan), məni onların (ailəmin) çətinliklərindən qurtarasan, məni və onları Öz xəzinəndən və sonu olmayan geniş lütfündən ehtiyacsızlığa qovuşdurasan, mənə və saleh bəndələrinə fayda verən hikmət və elm çeşmələrini mənim qəlbimdə qərar verəsən; (Səndən istəyirəm ki,) axır-zamanda təqvalıları mənə rəhbər qərar verəsən, necə ki, İbrahim Xəlili imam və rəhbər qərar verdin; beləliklə, Sənin tövfiqinlə nicat tapanlar nicat tapsınlar, tövbə edənlər tövbə etsinlər, abidlər ibadət etsinlər, Sənin köməkliyinlə yaxşı əməl sahibi və təvazökar olan salehlər – o kəslər ki, Sənə ibadət edir və Səndən qorxurlar - islah olsunlar; Sənin hidayətinlə nicat tapanlar Sənin odundan nicat tapdılar və məxluqatının təqvalıları bu oddan çəkindilər; Sən nəzər qılmadığına görə batil əhli ziyana uğradılar, zalımlar həlak oldular və qafillər qəflətə düçar oldular. Ey Allahım, nəfsimə təqva ver, belə ki, Sən nəfsimin sahibi və onu ən yaxşı pak edənsən. Ey Allahım, hidayət yolunu nəfsimə göstər və onu təqvaya vadar et, ölüm vaxtı Öz rəhmətini ona müjdə vet, onu Cənnətin ən uca mərtəbələrinə endir, onun ölümünü və həyatını pak et, onun dönüş yerini, məskunlaşdığı yeri, məkanını və sığınacağını girami et, çünki Sən onun sahibi və mövlasısan.
