Khudaya mujhe apni ma’rifat ata farma ke agar tu apne nafs ko na pehchanuayega to main tere Rasool ko bhi na pehchan sakoon ga. Aur Khudaya mujhe Rasool ki ma’rifat ata farma ke agar tu apne Rasool ko na pehchanuayega to main teri Hujjat ko bhi na pehchan sakoon ga. Aur Khudaya mujhe apni Hujjat ki ma’rifat ata farma ke agar tu apni Hujjat ko na pehchanuayega to main apne deen se bhatak jaoon ga. Khudaya mujhe jahiliyat ki maut na dena aur hidayat ke baad mere dil ko kaji na hone dena. Khudaya jis tarah tu ne hidayat di un logon ko wilayat ki jin ki ita’at ko wajib qarar diya aur jo Rasool ke baad tere auliya-e-amr hain, yahan tak ke main ne tere auliya-e-amr Ameer-ul-Momineen Ali bin Abi Talib, Hasan, Husain, Ali, Muhammad, Jafar, Musa, Ali, Muhammad, Ali, Hasan aur Hujjat Qaim Mahdi ki muhabbat paida ki — in sab par teri rehmatain hon — Khudaya ab mujhe apne deen par sabit rakhna aur apni ita’at mein laga dena. Apne Wali-e-Amr ke liye mere dil ko narm kar dena aur jin cheezon se apni makhluqat ka imtehan liya hai mujhe aafiyat mein rakhna. Apne us Wali-e-Amr ki ita’at par sabit qadam rakhna jis ko tu ne makhluqat se chhupa ke rakha hai aur woh teri ijazat se nigahon se ghaib ho kar tere amr ka intezar kar raha hai. Tu woh aalim hai jis ko taleem ki zaroorat nahin hai aur us waqt ko janta hai jis mein tere Wali-e-Amr ke liye salah hai ke us ko izhar-e-amr aur parda-kushai ki ijazat de. Khudaya mujhe in halaat mein sabr dena ta ke jisay tu ne dair mein rakha hai main us mein jaldi na karoon aur jis mein tu jaldi kare main us mein taakhir ka talabgar na hoon aur jisay tu ne parda mein rakha hai us raaz ko afsha na karoon aur jis ko tu ne chhupaya hai us se bahs na karoon. Teri tadbeer mein jhagra na karoon aur na yeh kahoon ke yeh kyun hai, kaise hai aur kya wajah hai ke Wali-e-Amr zahir nahin hota jab ke zameen zulm o jor se bhar gayi hai, balke main apne tamam umoor ko tere hawale kar doon. Khudaya mera sawal yeh hai ke mujhe apne Wali-e-Amr ko zahir ba-zahir hukm ko nafiz karte hue dikhla de. Mujhe maloom hai ke tere paas saltanat hai, qudrat hai, burhan hai, hujjat hai, mashiyat hai, quwwat o taqat hai. Lehaza momineen ke saath ehsan farma ke hum tere Wali-e-Amr ko dekh lein is aalam mein ke un ki baat zahir ho, un ki daleel wazeh ho, woh gumrahi se hidayat dein, jahalat se shifa dein. Khudaya un ke mushahida ko numayan kar de, un ke ghaib ko sabit kar de aur humein un logon mein qarar de de jin ki aankhein un ke didar se thandi hon aur un ki khidmat par qaim rahein. Unhi ki millat par uthana aur unhi ke giroh mein mahshoor karna. Khudaya unhein tamam makhluqat ke shar se mehfooz rakhna jin ko tu ne khalq kiya, ijad kiya, tasweer kashi ki, unhein saamne se, peeche se, daahne baen se aur upar neeche har taraf se apni us hifazat mein rakhna jis mein aane ke baad koi zaya nahin hota aur un ke wujood mein apne Rasool aur Wasi-e-Rasool ki hifazat farma. In sab par mera salam. Khudaya un ki umr daraz farma, un ki muddat mein izafa farma aur jo kaam un ke supurd kiya hai aur jis ka zimma banaya hai us par un ki madad farma. Un ki karamat mein izafa farma ke woh Hadi, Mahdi, Qaim aur hidayat yafta hain, tahir o taqi, zaki o naqi, razi o marzi, sabir o shakir aur ita’at mein koshish karne wale hain. Khudaya ghaybat ke tool ki bina par aur un ki kisi khabar ke na aane ki bina par hamare yaqeen ko chheen na lena. Un ke zikr aur un ke intezar, un par iman, un ke zuhoor ka muhkam yaqeen, un ke haq mein dua aur un par salawat se humein ghafil na hone dena ta ke tool-e-ghaybat un ke qiyam se mayoos na kar de aur hamara yaqeen un ki ghaybat mein waisa hi ho jaisa ke Rasool ke qiyam ka yaqeen hai aur un paighamat ka yaqeen hai jo wahi o tanzeel ke zariye aaye hain. Khudaya hamare walon ko quwwat de ke un par iman rakhein aur humein un ke haathon hidayat ke raaste par aur roshan mo’tadil raaste par chala de. Un ki ita’at ko quwwat de aur un ke ittiba par sabit qadam rakhna. Humein un ke giroh, un ke a’wan o ansar aur un ke amal se razi rehne walon mein qarar de dena aur is sharaf ko zindagi mein aur marte waqt tak hum se salb na kar lena ta ke hum duniya se uthein to isi aqeede par rahein — na koi shak ho, na koi inkar ho, na koi shuba ho, na koi takzeeb ho. Khudaya un ke zuhoor mein ta’jeel farma, apni madad o nusrat se un ki taeed farma, un ke madadgaron ki madad farma, un se kinara kash logon ko chhod de, jo un se adawat karein aur un ki takzeeb karein un par azab ko daimi bana de aur un ke zariye haq ko zahir farma, zulm ko murda bana de, apne bandagan-e-momineen ko zillat se nikaal le, shehron ko abad kar de, kufr ke zalimon ko khatam kar de, bade bade gumraho ki kamar tod de, jabbar aur kafir logon ko zaleel kar de, munafiqeen aur ahd-shikan aur tamam mukhalifeen o mulhideen ko sharq o gharb, bahr o barr, sahra o koh o maidan mein jahan bhi hon un ke zariye halak kar de ke un ki koi basti na reh jaye aur un ke asar tak baqi na rahen. Khudaya un logon se shehron ko paak kar de aur apne nek bandon ke dilon ko sukoon ata farma. Jo deen mit gaya hai use taza bana de, jo ahkam badal diye gaye hain aur jis sunnat mein taghayyur paida kar diya gaya hai us ki islah farma de ta ke un ke zariye aur un ke haathon par tera deen taro taza ho kar sahih saamne aaye jis mein koi kaji na ho, na koi bid’at ho, yahan tak ke un ki adalat se kuffar ki aag ko bujha de. Is liye ke woh tere woh bande hain jin ko tu ne apne nafs ke liye khalis banaya hai, apne deen ki nusrat ke liye pasand kiya hai, apne ilm se intikhab kiya hai, gunahon se mehfooz rakha hai, aib se bari banaya hai, ghaib ki ittila di hai, nemat nazil ki hai, unhein har rijs se paak banaya hai aur kasafat se paak rakha hai. Khudaya un par aur un ke aba-e-tahireen Aima par aur un ke muntakhib shiyon par rehmat nazil farma aur un ko un ki aarzooon tak pohncha de aur is salawat ko hamari taraf se har shak o shuba aur har riya kari o dikhawe se khalis rakhna ta ke tere ilawa kisi ka irada na karein aur teri marzi ke ilawa kisi ke talabgar na hon. Khudaya hum is baat ke fariyadi hain ke tera Nabi duniya se ja chuka, Imam ghaib mein hai, zamana sakht hai, fitne nazil ho rahe hain, dushmanon ne hamare khilaf ijtima kar liya hai, a’daad ki kasrat hai, hamari adad ki qillat hai. Khudaya humein sukoon ata farma apni fawri fatah ke zariye aur apni us madad ke zariye, hamari is dua ko qabool farma le. Khudaya hum tujh se sawal karte hain ke apne Wali ko ijazat de de ke woh bandon mein tere adl ka izhar kare, shehron mein tere dushmanon ko qatl kare yahan tak ke zulm ke liye koi baqiya reh na jaye jisay fana na kar de, koi quwwat na reh jaye jisay kamzor na kar de, koi rukun na ho jisay munhadim na kar de, koi baadh na ho jisay kund na kar de, koi silah na ho jisay bekar na kar de, koi parcham na ho jisay gira na de, koi bahadur na ho jisay maar na de, koi lashkar na ho jisay paspa na kar de. Khudaya in zalimon ko apne pathar ka nishana bana de jo unhein pash pash kar de, apni shamsheer-e-qati se unhein halak kar de aur us azab ke zariye jo tu mujrimoon se palatata nahin hai apne Wali aur apne Rasool ke dushmanon par azab nazil farma, apne Wali ke haathon aur apne momin bandon ke haathon. Khudaya apne Wali aur zameen mein apni Hujjat ko dushmanon ke haul se aur burai chahne walon ke makr se mehfooz rakhna. Jo un se makr kare us ka jawab dena, jo un ke liye burai chahein un par burai ki chakki chala dena aur zalimon ki pohnch ko un se qata kar dena aur un ke dilon ko khaufzada bana dena, un ke qadam mein zalzala paida kar dena aur unhein ala al-e’laan achanak apni girift mein le lena, un par azab ko shadeed kar dena aur bandon mein unhein ruswa kar dena, shehron mein un par la’nat karna aur unhein jahannam ke aakhri tabaq mein jagah dena aur sakht tareen azab ko muheet kar dena, aag mein unhein jala dena, un ki qabron ko aag se bhar dena, unhein aatish-e-jahannam mein jala dena ke unhon ne namazon ko barbaad kiya hai, khwahishat ka ittiba kiya hai, tere bandon ko gumrah kiya hai, tere shehron ko barbaad kiya hai. Khudaya apne Wali ke zariye Quran ko zinda bana de aur humein un ke noor ko daimi taur par dikhla de jis mein koi burai andhera na ho, un ke zariye murda dilon ko zinda kar de, ranjida dilon ko sukoon de de, mukhtalif khwahishat ko haq par jama kar de, mu’attal hudood ko qaim kar de, nazarandaz ho jane wale ahkam ko raij kar de yahan tak ke koi haq baqi na reh jaye jo zahir na ho, koi adl na reh jaye jo roshan na ho. Khudaya humein un ke madadgaron mein, un ki saltanat ko quwwat dene walon mein, un ke amr ka ittiba karne wale, un ke fe’l se razi aur un ke ahkam ke liye sarapa tasleem logon mein qarar dena, unhein qarar de dena jin ko phir dobara taqiyya ki zaroorat na reh jaye. Aur tu ae Parwardigar woh hai jo takleefon ko door karta hai, mudtar ki dua ko qabool karta hai aur use karb-e-azeem se nijat deta hai. Khudaya har ranj ko apne Wali se door kar de aur unhein zameen mein apna khalifa bana de jaisa ke tu ne wada kiya hai. Khudaya humein Aal-e-Muhammad ke dushmanon mein aur un se ikhtilaf karne walon mein na qarar dena, humein un logon mein na qarar dena jo Aal-e-Muhammad se adawat o keena rakhte hon. Main tujh se in baton mein teri panah chahta hoon lehaza mujhe panah de de aur main tere saya mein aana chahta hoon lehaza mujhe jagah de de. Khudaya Muhammad o Aal-e-Muhammad par rehmat nazil farma aur un ke zariye mujhe apni bargah mein duniya o aakhirat mein kamyab bana de aur muqarrabeen mein qarar de de. Ameen ya Rabb-al-Alameen.
