دعائے سیفی صغیر المعروف بہ دعائے قاموس

(شیخ بزرگوار ثقۃ الاسلام نوری طاب ثراہ نے صحیفۂ ثانیہ علویہ میں اس دعا کو ذکر کیا ہے اور فرمایا ہے کہ ارباب طلسمات و تسخیر کے کلمات میں اس دعا کی عجیب و غریب شرط ہے اور اس کے عجیب و غریب آثار کا ذکر کیا گیا ہے مگر چونکہ مجھے ان لوگوں کے بیان پر اعتماد نہیں ہے لہٰذا میں نے ان آثار کا ذکر نہیں کیا ہے البتہ علمائے اسلام کی تاسی میں دعاکو نقل کیا جا رہا ہے۔)

بنام خدائے رحمان و رحیم

پرودرگار مجھے اپنے دریائے ہدایت کی گہرائیوں میں داخل کر دے

اور اپنی وحدانیت کے طوفان میں غرق کردے۔

مجھے اپنی یکتائی کی طاقت و سطوت کے ذریعہ قوّت عطا فرما۔

تا کہ میں تیری فضائے رحمت تک نکل آؤں

اس طرح کہ میرے چہرے پر تیری رحمانیت کے آثار اور تقرب کی روشنی چمک رہی ہو

اور مجھ میں تیری ہیبت سے خوف پیدا ہو جائے۔

میں تیری عنایت سے صاحب عزّت ہوں

اور تیرے کرم سے صاحبِ کرامت ہو جاؤں

تیری تعلیم اور تیری پاکیزگی کی بنا پر۔

خدایا مجھے عزّت اور قبولیت کا لباس عنایت فرما

اور میرے لئے اپنی بارگاہ تک پہنچنے کے راستے آسان کردے۔

میرے سر پر کرامت اور وقار کا تاج رکھ دے

اور میرے اور اپنے چاہنے والوں کے درمیان

دنیا اور آخرت میں الفت پیدا کردے۔

اپنے اسمائے الٰہی کے نور سے مجھے ہیبت و سطوت عنایت فرما جس کی بنا پر

قلوب اور ارواح میرے لئے مطیع ہو جائے

اور نفوس اور اجسام میرے سامنے خاضع ہوجائیں۔

اے وہ پروردگار جس کے سامنے جابروں کی گردنیں جھک گئی ہیں

اور جس کی بارگاہ میں بڑے بڑے بادشاہ سرنگوں ہوگئے ہیں

جس سے ہٹ کے کوئی پناہ گاہ نہیں ہے

اور نہ تیرے علاوہ کوئی مدد کرنے والا ہے

اور نہ تیرے علاوہ کسی پر بھروسہ ہوسکتا ہے۔

خدایا مجھ سے حاسدوں کے مکر کو

اور دشمنوں کے شر کو دور کردے۔

مجھ پر رحم فرما اور مجھے سرا پردۂ عرش کے نیچے جگہ دے۔

اے بہترین کرم کرنے والے۔

میرے ظاہر کی تائید فرما اپنی مرضی کو حاصل کرنے کے لیے

تا کہ میں تیری بارگاہ کے راستوں کی اطلاع حاصل کرسکوں۔

خدایا میں تیری بارگاہ سے ناامید کس طرح جاسکتا ہوں

جب کہ میں بڑے اعتماد کے ساتھ وارد ہوا ہوں

اور تو مجھے اپنی عطا سے کس طرح مایوس کردے گا

جب کہ تو نے خود دعا کرنے کا حکم دیا ہے

اور اب میں تیری طرف آرہا ہوں

تیری پناہ لینے کے لیے۔

میرے اور میرے دشمنوں کے درمیان دوری پیدا کر دے

جس طرح میرے دشمنوں کے درمیان اختلاف پیدا کیا ہے۔

ان کی نگاہوں کو خیرہ کر دے

اپنے نورِ اقدس

اور اپنے جلالِ بزرگی کی بنا پر۔

اس لیے کہ تو وہ پروردگار ہے

جو عظیم نعمتیں عطا کرنے والا ہے۔

اپنے ہر مناجات کرنے والے کے لئے اپنی رحمت کی مہربانیوں کے ذریعہ

اے حیّ اے قیّوم،

اے صاحبِ جلال و اکرام۔

اللہ ہمارے آقا اور پیغمبر حضرت محمدؐ

اور ان کی آل طیبین و طاہرین پر رحمت نازل فرمائے۔