تعقیبات نمازعشائ

(مولف: یہ دعا رزق کی دعاؤں میں سے ہے اور مستحب ہے کہ نماز عشاء کے بعد سات مرتبہ سورہ انا انزلنا پڑھا جائے اور نافلۂ عشاء جس میں قرآن مجید کی سو (۱۰۰)آیتیں ہیں پڑھے اور بہتر یہ ہے کہ سو آیتوں کے بدلے پہلی رکعت میں سورہ واقعہ اور دوسری رکعت میں سورہ قل ھو اللہ پڑھے(کہ سورۂ واقعہ میں ۹۶ آیتیں ہیں اور سورہ قل ھواللہ میں چار آیتیں ہیں۔)

خدایا مجھے نہیں معلوم ہے کہ میرے رزق کی منزل کیا ہے۔

میں تو صرف ان خیالات کے پیچھے دوڑتا رہا جو میرے دل میں پیدا ہوتے ہیں،

چنانچہ اس راہ میں شہر شہر کے چکر لگاتا ہوں

اور میں اپنے مقصود کے لئے حیران و پریشان ہوں۔

مجھے نہیں معلوم ہے کہ میرا رزق صحرا میں ہے یا پہاڑ پر،

زمین میں ہے یا آسمان پر،

خشکی میں ہے یا دریا میں

کس کے ہاتھوں میں ہے،

کس کی طرف سے آنے والا ہے۔

ہاں یہ جانتا ہوں کہ اس کا علم تیرے پاس ہے

اور اس کے سباب بھی تیرے ہی ہاتھوں میں ہے۔

تو ہی اپنے لطف سے اسے تقسیم کرتا ہے

اور اپنی رحمت سے اس کے اسباب پیدا کرتا ہے۔

خدایا محمدؐ و آل محمدؐ پر رحمت نازل فرما

اور اپنے رزق کو میرے لئے وسیع بنا دے،

اس کے طلب کو آسان کر دے۔

اس کے مرکز کو قریب تر بنا دے

اور مجھے ایسے کسی رزق کی جستجو کی زحمت میں نہ ڈال دینا جو تو نے میرے لئے مقرر نہیں کیا ہے

اس لئے کہ تو میرے عذاب سے بےنیاز ہے

اور میں تیری رحمت کا محتاج ہوں۔

خدایا محمدؐ و آل محمدؐ پر رحمت نازل فرما

اور فضل و کرم سے اپنے بندہ پر مہربانی فرما

کہ تو صاحب فضل عظیم ہے۔