اے معبود! تیری پسند وہ ہے جس کام کے لئے میں نے تجھ سے خیر طلب کی

تو آرزوؤں تک پہنچاتا ہے بڑی بڑی عطائیں کرتا ہے

مطالب میں فائدہ دیتا ہے کاروبار کو پاک کردیتا ہے

بہترین راستے پر چلاتا ہے

قابلِ تعریف انجام تک لے جاتا ہے

اور پُر خطر مصیبتوں سے بچاتا ہے

اے معبود! تجھ سے طالب ِخیر ہوں اس کام کے لیے جس کا میں نے ارادہ کیا

اور میری عقل مجھے اس تک لے گئی

اے معبود! اس میں جو مشکل ہے آسان کردے

جومشکل ہے ہموار کردے

سخت کام میں میری مدد فرما

برے انجام سے محفوظ رکھ

اور اے پروردگار اس کے نتائج بہتر بنادے

خطرے میں سلامتی دے

دور کو نزدیک

اور تنگی کو آسانی میں بدل دے

اے معبود! میری دعا قبول فرما

میری خواہش پوری کر

میری حاجت پوری کر

اس کام کی تکلیفیں مجھ سے دور کر

اس کی برائیوں کو دور فرما

اور اے معبود! اس میں مجھے کامیابی کے پرچم دے

وہ بھلائی دے جو تجھ سے چاہی ہے

جو دعا کی ہے اس میں زیادہ حصّہ دے

وہ فائدے عطا کر جن کی تجھ سے آرزو کی ہے

اس مقصد میں کامیابی سے ہم کنار فرما

اس میں بہتری پیدا کر

اس میں مجھے خوشی کے اسباب نمایاں کر کے دکھا

کہ ان میں بہرہ مندی کے نشان ظاہر ہوں

ان میں دشواری کا راستہ بند کر دے

اس کو آسانی کے قریب کردے

اس میں مدہم چیز کو روشن کردے

اس میں بندھے ہوئے کو کھول دے

اس کی بنیاد مضبوط بنا کہ

مجھے خیر ہی خیر حاصل ہو جس میں فوائد ہوں

نقصان کو ہٹا

جلد نفع عطا فرما

عمل میں پاکیزگی دے

کیوں کہ تو زیادہ دینے والا

عطا میں پہل کرنے والا ہے۔

اے معبود! تیری رحمت کی وسعت نے مجھے گناہوں کی معافی مانگنے کی طاقت دی ہے

تیری طرف سے مہلت

اور نرمی کی امید نے مجھے تجھ سے امان لینے

اور معافی مانگنے کا حوصلہ دیا

اے پروردگار! میرے گناہ ایسے ہیں

جن کے سامنے انتقام کا چہرہ ہے

میری ایسی خطائیں ہیں جو اچک لینے پر تیار ہیں

جن کےباعث میں تیرے عدل کے پیش ِنظر سخت عذاب کے قابل ہوں

اور تیری طرف سے سخت سزا کا مستحق بن چکا ہوں

مجھے ڈر ہے کہ یہ قبولیت ِدعا میں دیر کرائیں گی

اور حاجتیں پوری ہونے میں رکاوٹ بنیں گی

میرے طلب کرنےکی وجہ سے،

فائدہ بنانے اور میرے شوق کو کم کرنے کے لیے

کیوں کہ گناہوں اور خطاؤں کے بوجھ سے میری کمر جھکی ہوئی ہے

اور میں مجبوری سے ان کا بوجھ اٹھائے ہوئے ہوں

لیکن اے پروردگار! جب میں نے خطا کاروں سے تیری نرمی،

گنہگاروں کے بارے میں تیری معافی و در گزر

اور نافرمانوں پر تیری مہربانی کو دیکھا

تو میں تجھ پر اعتماد کے ساتھ تیری طرف بڑھا

اور خود کو تیرے آستانے پر ڈال دیا

تجھ سے اپنا دردِ دل کہتے ہوئے

ایسی چیز کا سوال کیا جس کا اہل نہیں ہوں یعنی اندیشے مٹائے جانے کا

اور وہ جس کا حق دار نہیں ہوں یعنی غم دور کیے جانے کا

تجھ سے در گزر کا طالب ہوں

میرے مولا مجھے تجھی پر بھروسہ ہے

اے معبود! پس مجھ پر احسان فرما کر کشائش و آسائش دے

مشکلوں سےآسانی کے ساتھ نکال

اپنی مہربانی سے میری رہنمائی کر

سیدھی راہ کی طرف اور اپنی قدرت سے مجھے گمراہی کے راستے سے ہٹا لے

اپنی در گزر سے کام لے کر مجھے دُکھوں کی قید سے چھڑا دے

اپنی رحمت سے میری اسیری کو ختم کر دے

اپنی خشنودی عطا فرما مجھ پر

اپنا احسان و کرم کر

میرے گناہ بخش دے

مصیبت دور کر دے

میرے گریہ و زاری پر رحم عطا کر

میری دعا کو نظر انداز نہ کر

مجھےمعافی دے کر مجھے قوی بنا

اس سے میری کمر مضبوط فرما

اس سے میرے کام سنوار دے

اس سے میری عمر میں طول دے

روزِ حشر اور قبر سے اٹھنےکے وقت رحم فرما

بے شک تو سخی، عطا کرنے والا،

بخشنے والا اور مہربان ہے۔

اور رحمت نازل فرما محمدؐ اور ان کی آلؑ پر

اے معبود! میں نے سفر کا ارادہ کیاہے

اس میں بہتری پیدا کر

اس میں میرے لیے پختہ ارادے کی راہ کھول دے اور سمجھا دے

اس میں میرے لیے ثابت قدمی کا راستہ کھول

مجھے اس سفر میں سلامتی سے بہرہ مند فرما

مجھے بہت زیادہ آمدنی اور عزّت عطا فرما

مجھے اپنی بہترین حفاظت اور نگرانی میں قرار دے

اے معبود! مجھے سفر کی تھکاوٹوں سے محفوظ فرما

بیابانوں کی سختیاں میرے لیے آسان کردے

دور کی منزلوں کو میرے لئے لپیٹ دے

پانی کے دور کے گھاٹ میرے لئے نزدیک کردے

دورانِ سفربارکشوں کے قدموں کو دراز فرما

تاکہ دور کے فاصلے قریب

اور بیابانوں کی سختیاں آسان ہوجائیں

اور اے معبود! اس سفر میں بابرکت پرندے کو میرے ہمراہ کردے

اس میں سلامتی سے بہرہ مند فرما

ثابت قدمی کو نگہبان بنا

اور راستے کے خطروں کے لیے راہنما

کفایت عطا فرما،

اور سرپرستی کرنے والا پاسدار عطا کر

اے معبود! میرے سفر کو سلامتی والا

اور منافع بخش قرار دے

رات کو میرے لیے آفات سے پردہ بنادے۔

اور دن کو خطرات میں رکاوٹ کا ذریعہ بنا دے

اپنی قدرت سے راہزنوں کی ٹولیوں کو مجھ سے ہٹائے رکھ

اپنی طاقت سے مجھے درندوں سے بچائے رکھ

یہاں تک کہ اس میں سلامتی میری ہم دم

اور حفاظت میرے ساتھ ساتھ رہے

برکت میرے پیچھے،

آسانی میرے ہمراہ،

تنگی مجھ سے دور،

کامیابی میرے ساتھ

اور امن میرا ساتھی ہو

بے شک تو بخشش و احسان کا مالک

اور قوت و طاقت والا ہے

تو ہی ہر چیز پر قدرت رکھتا ہے

اور اپنے بندوں کو دیکھتا جانتا ہے۔

پروردگار میرے اوپر رزق کے بادلوں کو برسا دے

اور فضل و کرم کی بارش کردے اور اس بارش کو دوام عطا فرما

میری ضرورتوں کے علاوہ اضافی نعمتوں کا سایہ کردے

اپنی سخاوت سے مجھے اپنا ہی محتاج رکھ

مجھے اس شخص سے بے نیاز رکھ جو تجھ سے مانگتا ہے

اپنے فضل کو میری ناداری کی دوا بنا

اپنی عطا سے میری حاجت کو بیدار فرما

میری تنگ دستی کو اپنی بہت عطاؤں کا

اور میری بے نوائی وفقیری کو

اپنی بخشش کا صدقہ دے

اے پروردگار! میرے لئے رزق کی راہ آسان کر دے

میرے لیے اس کی بنیادیں مضبوط بنا دے

اپنی رحمت سے میرے لیے فراوانی کے چشمے جاری کردے

اپنی مہربانی سے میری زندگی میں خوشیوں کی نہریں رواں کردے

میرے فقر کی زمین کو بنجرکردے

میری بدحالی کے قحط کو فراوانی میں بدل دے

میری روزی میں جو رکاوٹیں ہیں وہ دور کردے

مجھ سے تنگی کے نشان الگ کر دے

اور مجھے وسعت ِرزق کا ہدف بنا اے معبود! روزی کی بوچھار کردے

میری زندگی کو زیادہ سے زیادہ پُر مسرت بنا

اور اے معبود! مجھ کو آسائش کا جامہ پہنا اور خوشی کی چادر اوڑھا دے

پس اے پروردگار! میں منتظر ہوں کہ تنگی دور ہو اور مجھے تیری نعمتیں نصیب ہوں

تاخیر ختم ہو

اور تیری عطا مل جائے روزی کی تنگی دور ہو

اور تو فضل سے نواز دے میرا رشتہ تیرے کرم سے جڑے

اور آسانی نصیب ہو اور برسا دے اے معبود! روزی کے آسمان سے لگاتار بارش

مجھے نعمتوں سے زیادہ حصہ دے مخلوق سے بے نیاز کردے

میری ناداری کے گلے پر تیر مار دے

اور میری تنگی دور کرکے اس کا بوجھ

تیز تر بار کشوں پر لاد دے

میری عسرت و تنگی کی گردن پر نابودی کی تلوار چلا دے

اے پروردگار! مجھے اپنی وسیع نعمتوں کا تحفہ عطا کر

اور مال میں اضافے سے میری مدد کر

مجھے تنگ دستی کی اذیّت سے محفوظ فرما

اور قحط کی تکلیف مجھ سے دور رکھ

میرے لیے نعمتوں کی بساط بچھا دے

اور مجھے اپنی روزی کے خوش گوار پانی سے سیراب کر

میرے لئے اپنی عمومی عطا کے دروازے کھول دے

مجھے غیر متوقع دولت عنایت فرما

اور اس کے ذریعے مجھے تنگی سے نکال

صبح کے وقت میری مدد فرما

اور خوش حالی کا مالک بنادے

بے شک تو بہت بڑی بخشش

عام فضل وکرم،

گراں قدر احسان کا مالک

اور بہت دینے والا سخی ہے۔

اے معبود! میں تیری پناہ لیتا ہوں نازل ہونے والی بلاؤں کے نازل ہونے

اور بڑی بڑی تکلیفوں کے خطروں سے

پس اے میرے رب مجھے پناہ دے بے سامانی کی سختیوں سے

مجھے مصیبتوں کے حملوں سے بچائے رکھ

مجھے ناگہانی عذاب سے نجات دے

نعمتوں کے زوال

اور قدموں کی لغزش سے پناہ دے مجھے

اے معبود! اپنی عزّت کے احاطے

اور بچاؤ کی حفاظت میں

ناگہانی آفتوں سے

اور جلد آنے والی پریشانیوں سے پناہ دے

اے معبود! اے رب تو بلاؤں کی سرزمین کو نیچے دھنسا دے

سختیوں کے میدان کو اکھاڑ دے

مصیبتوں کے سورج کو گہنا دے

برائی کے پہاڑوں کو توڑدے

زمانے کےکرب کو دور کردے

کاموں کی رکاوٹوں کو ہٹا دے

مجھے سلامتی کے حوضوں میں پہنچا دے

مجھے آبرو کی سواریوں پر سوار کردے

گناہوں سے بچنے میں میرا ساتھ دے

مجھے پردہ پوشی میں شامل کرلے

مجھ پر سخاوت فرما اے رب اپنی نعمتوں کی

بلائیں دور کرنے کی

اور اپنی سختیاں دور رکھنے کی

مجھ سے اپنے تمام عذاب دور فرما

اپنی سخت سزاؤں کا رخ موڑ دے

مجھے زمانے کی بدحالیوں سے پناہ دے

مجھے ہر کام کے بُرے انجام سے نجات دے

ہر خطرے سے میری حفاظت فرما

میرے معاملوں میں ہر مصیبت کے پتھر توڑ دے

اور جب تک زندہ ہوں ان کے ہاتھ شل کردے

بے شک تو رب ہے بزرگی والا

آغاز کرنے والا لوٹانے والا

جو چاہے کرنے والا۔

اے معبود! میں نے سچّے دل سے سچّی وحقیقی توبہ کرنے کے لیے تیری طرف رُخ کیا

پکا عہد وپیمان باندھنے

رنجیدہ دل کے ساتھ پکارنے

اور واضح بات کرنے کے لیے

اے معبود! مجھ سے قبول فرما خالص توبہ

جلد باز آجانے کا قول

گناہوں کے خوف سے گرپڑنے کو

اے رب میری توبہ قبول کر بہت بڑے ثواب

بہتر بازگشت کے ساتھ

عذاب کی بخشش،

سزا میں در گزر

واپسی کی غنیمت

گناہوں کی پردہ پوشی فرما

اور اے معبود! میرے جو گناہ تو نے لکھے وہ مٹا دے

میری توبہ قبول کرکے میرے گناہ دھو دے

اس توبہ کو میرے دل میں روشن کرنے والی

میری عقل کو بصیرت کا مقام دینے والی

میری میل کو دور کرنے والی

میرے بدن سے ناپاکی ہٹانے والی

میرے قلب وضمیر کو درست کرنے والی

میری عقل و سمجھ کو بصیرت سے ہم کنار کرنے والی بنادے

اور اے پروردگار! میری توبہ قبول فرما

کہ یہ میری خالص نیت

اور سمجھ بوجھ کے ساتھ انجام پارہی ہے

میرے باطن کے ہر پہلوسے ہو رہی ہے

دل کے چھپے گوشوں کی توجہ سے ہوئی ہے

تیرے حضور میری بازگشت

اور تیرے حکم پر جلد تر عمل کے ساتھ ہو رہی ہے

اے معبود! اس توبہ کے ذریعے مجھ سے گناہوں پر اصرار کی تاریکی دور کردے

اور اس سے پہلے جو گناہ کرچکا ہوں وہ مٹادے

مجھے پرہیز گاری کا لباس پہنا

اور ہدایت کی چادر اوڑھا دے

کیوں کہ میں نے اپنے اوپر سے گناہوں کا لبادہ اتار دیا

اور خطاؤں کا پیراہن اپنے بدن سے کاٹ پھینکا ہے

اے پروردگار! میں نے اپنے نفس کے خلاف تیری قدرت

تیری عزّت سے مدد حاصل کرکے

اپنی توبہ کو بچانے کے لیے تیرے سپرد کررہا ہوں

اسے رسوائی سے محفوظ رکھنے کے لیے تیری نگہبانی میں دے رہا ہوں

یہ کہہ کر کہ نہیں ہے طاقت و قوّت مگر تجھ سے۔

اے معبود! مجھے وہ حج نصیب فرما

جو تو نے ان لوگوں پر فرض کیا ہے جو آنے جانے کا خرچ اٹھا سکتے ہیں

اس میں میری ہدایت کا وسیلہ قرار دے اس کی طرف رہنمائی فرما

اور دور کے راستے میرے لیے قریب کر دے

اعمالِ حج ادا کرنے میں میری اعانت ومدد فرما

میرے احرام باندھنےسے میرے بدن کو آگ پر حرام کر دے

سفر کے لیے میری ہمّت و قوّت بڑھا دے

اے معبود! تو مجھے اپنے سامنے کھڑے ہونے

اور وہاں تک آنے کی توفیق عطا فرما

اس میں مجھے بہت سے فائدے اور کامیابی دے

اور اے پروردگار! مجھے حج اکبر کے وقوف سے مشعر میں مقام ِ تقرب تک پہنچا

جو مزدلفہ میں ہے

تیری رحمت سے قریب

اور تیری رحمت میں جانے کا ذریعہ بنے

مجھے مشعر الحرام کی جگہ

اور وقوف حرام کے مقام پر کھڑا کر

مجھے اس کا اہل بنا کہ اعمال حج ادا کروں

اور ان اونٹوں کو ذبح کر کے

جو بڑی کوہان والے،

جوش مارتے خون والے

اور بہتے خون والی رگیں رکھتے ہیں

بہت سی قربانیاں کروں اور ان کی شہ رگیں کاٹوں

تیرے حکم کے مطابق وہ فریضہ ادا کروں جو تو نے عائد کیا

اے معبود! مجھے توفیق دے کہ نمازعید ادا کروں

تیرے وعدے کی امید پر

تیری دھمکی سے ڈرتے ہوئے

اپنے سر کے بالوں کو منڈوائے

یا کم کیے ہوئے تیری فرماں برداری کی کوشش پر کمر باندھے ہوئے

جمروں کو

سات سات کنکریاں مارتے ہوئے تیرا حکم بجا لاؤں

اور مجھے داخل کر اے معبود! اپنے گھر کے احاطہ

و اطراف میں جو امن کی جگہ اور تیرا کعبہ ہے

مجھے اپنے محتاجوں اور سائلوں میں رکھ

اے معبود! مجھے بہت زیادہ اجر دے

میری واپسی اور میرے کوچ کرنے پر

اور کامل فرما اے معبود !میرے اعمال ِحج کو

اور اپنی بارگاہ میں مجھ پر

عنایت کرتے ہوئے

آہ وزاری کو قبول کر

اے سب سے زیادہ رحم کرنے والے۔

اے معبود! تیرے شہروں میں تیرے بعض بندوں کا ظلم یوں پھیلا ہوا ہے

کہ اس سے عدل ختم ہو گیا ہے

راستے کٹ گئے

حق مٹ گیا

اور صدق باطل ہو گیاہے

نیکی ماند پڑ گئی

برائی سامنے آگئی

پرہیزگاری ختم

اور ہدایت نابود ہو گئی

اچھائی مٹ گئی

بُرائی اُبھر آئی

بگاڑ بڑھ گیا

دشمنی عام ہو گئی

ظلم پھیل گیا

اورزیادتی حد سے بڑھ گئی ہے

اے معبود! اے رب اسے کوئی دور نہیں کر سکتا مگر تیری قوت کوئی اس سے بچا نہیں سکتا

مگر تیرا احسان

اے معبود! میرے رب ظلم کی جڑ کاٹ دے

ظلم کے پہاڑ ڈھا دے

بدی کا بازار ٹھنڈا کر دے

اور جو ظلم کو روکے اُسے قوّت دے

ظلم کرنے والوں کے بازو توڑ دے

انہیں منتشر کرنے کے بعد پریشانی میں ڈال دے

اور اے معبود!ان پر جلد تر دشمنوں کو چڑھا دے

جو ان کے ہاتھ پاؤں کاٹ ڈالیں

برائی کی مہلت ختم کر دے

تاکہ خوف زدہ لوگ امن پائیں

مظلوم کو راحت ملے

بھوکوں کو طعام ملے

اجڑے ہوئے آباد ہوں

بے وطنوں کو پناہ ملے

بھاگے ہوئے واپس آئیں

بے نواؤں وفقیروں کو مال ملے

اور پناہ لینے والے پناہ پائیں

بزرگوں کی عزّت ہو

اور چھوٹوں کو پیار ملے

مظلوم کو قوت حاصل ہو

اور ظالم پست ہو جائے

غم زدہ کا غم مٹے

مکمل اندھیرا ختم ہو جائے

ہنگامہ ختم ہو

اور بےاتفاقی ختم ہو جائے

علم کا فروغ ہو

سلامتی عام ہو

اختلاف دور ہو جائے

ایمان کو بڑھاوا ملے

اور قرآن پڑھا جائے

بے شک تو جزا دینے والا نعمت عطا کرنے والااحسان کرنے والا ہے۔

اے معبود! تیرے لیے حمد ہے

آنے والی بلاؤں کو دور کرنے پر

ناگوار مصیبتیں ہٹانے پر

در پیش آنے والے خطرات کو ٹالنے پر

اور پے در پے نعمتیں بخشنے پر

تیرے لیے حمد ہے تیری بہترین عطاؤں پر

تیری خوب تر آزمائش پر

اور تیری شان دار نعمتوں پر

اور تیرے لیے حمد ہے تیرے بہت زیادہ احسان پر

تیری جوش مارتی خیر پر

تیری طرف سے آسان فریضے پر

اور تنگی دور رکھنے پر

اور تیرے لیے حمد ہے اے رب

کہ توتھوڑے سے شکر کا پھل دیتا ہے

تیرے لیے حمد ہے کہ زیادہ اجر عطا کرتا ہے

گناہوں کا بوجھ اتار دیتا ہے

بے موقع سا عذر بھی قبول کرتا ہے

تو سخت فریضے کا بوجھ اتارتا ہے

تو دشواری کے مقام کو آسان کرتا ہے

اوردل ہلا دینے والے امور کو روکے ہوئے ہے

تیرے لیے حمد ہے اس پر جو بلا ٹل چکی ہے

نیکی میں اضافے پر

خوف دور ہونے پر

سر کشی کو رام کرنے پر

اور تیرے لیے حمد ہے کم فریضہ عائد کرنے پر

اور اس میں زیادہ کمی کرنے پر

کمزور کو قوت دینے پر

اور بے کس کی فریاد رسی پر

اور تیرے لیے حمد ہے وسیع مہلت دینے پر

ہمیشہ نعمتیں عطا کرنے پر

عذاب کو ٹال دینے پر

تیرے اچھےاچھے کاموں پر

اور تیری لگاتار رعنائیوں پر

اور تیرے لیے حمد ہے، عذاب کی جلدی کو تاخیر کرنےپر

اور عذاب میں جلدی نہ کرنے پر

توبہ کی راہ کو آسان کرنے پر

اور ابرِ رحمت سے بارش برسانے پر

بے شک تو احسان و عطا کرنے والا ہے۔

جس کو تو نے دعا کا حکم دیا وہ تجھ پکارنے کا حق دار ہے

جس سے تو نے قبولیت کا وعدہ کیا وہ تجھ سے امید لگا سکتا ہے

اور اے معبود! میری کچھ حاجات ہیں

کہ ان میں میری ہمت جواب دے گئی

میری طاقت کمزور ہوگئی

اس کے حصول میں میری قوّت نرم پڑگئی

میرے مارنے والے نفس نے بدی کو میرے لیے آراستہ کیا

اور فریب کار دشمن نے جس کے چنگل میں ہوں

مجھے تیری طرف آنے سے روکا ہوا ہے

اے معبود! میرے نفس کوامن کے ساتھ کامیابی دے

اسےنجات پانے کا راستہ دکھا

میرے سینے کو ان حاجات کے پور اہونے کی امید سے کشادہ فرما

مجھے زیادہ اسباب عطا کر

اور اس آرزو تک پہنچنے کی صورت پیدا کر دے

اور وہ چیز پاؤں جس کی امید ہے

اے معبود! حاجات کے پورا ہونے میں میری مدد فرما

میرے شوق کو

سچّا ثابت فرما

اور اے معبود! مجھے بچائے رکھ اپنے کرم سے کہ ناکامی مایوسی تاخیر

اور درماندگی وعاجزی میں پڑجاؤں

اے معبود!بے شک تو بہت بڑی عطاؤں کا مالک اور عطا کرنے والا ہے

تو ہی ہے جو

ہر چیز پر قدرت رکھتا ہے

تو اپنے بندوں کو جانتا دیکھتا ہے۔