Salawat bar Paighambar-e-Akram (s.a.w.w)

Khudaya rehmat nazil farma Hazrat Muhammad (s.a.w.w) par jis tarah unhon ne teri wahi ka baar uthaya aur tere paighamat ko pahunchaya aur rehmat nazil farma Hazrat Muhammad (s.a.w.w) par jis tarah unhon ne tere halal ko halal aur tere haram ko haram qarar diya. Aur teri kitab ki taleem di.

Aur rehmat nazil farma Hazrat Muhammad (s.a.w.w) par jis tarah unhon ne namaz qaim ki aur zakat ada ki aur tere deen ki dawat di aur rehmat nazil farma Hazrat Muhammad (s.a.w.w) par jis tarah unhon ne tere wade ki tasdeeq ki aur tere azab se bandon ko daraya aur rehmat nazil farma Hazrat Muhammad (s.a.w.w) par jis tarah tu ne un ke zariya gunahon ko bakhsh diya aur uyoob ki parda-poshi ki aur ranj-o-gham ko door kiya aur rehmat farma Hazrat Muhammad (s.a.w.w) par jis tarah tu ne un ke zariya bad-bakhti ko door kiya aur ghamon ka ilaj kiya aur duaon ko qubool kiya aur balaon se najat di.

Aur rehmat nazil farma Hazrat Muhammad (s.a.w.w) par jis tarah tu ne un ke zariya bandon par reham kiya aur shehron ko zinda kiya aur jabiron ki kamar tod di aur firaunon ko halak kar diya aur rehmat nazil farma Hazrat Muhammad (s.a.w.w) par jis tarah tu ne un ke zariya amwal mein izafa farmaya aur houlnak mawarid se mehfooz rakkha aur buton ko tod diya aur insanon par meharbani farmayi.

Aur rehmat nazil farma Hazrat Muhammad (s.a.w.w) par jis tarah tu ne un ko behtareen deen ke sath bheja aur un ke zariya iman ko izzat di aur buton ko halak kar diya aur apne Bait-ul-Haram ko mukarram bana diya aur rehmat nazil farma Hazrat Muhammad (s.a.w.w) aur un ke Ahl-e-Bait (a.s) tahireen naik kirdar par aur tera salam un ke liye ho.