Du'a 8: Khwaastgaari Panaah ke Silsile ki Du'a

Ae Allah! Main tujh se panah mangta hoon hirs ki tughyani, ghazab ki shiddat, hasad ki cheera-dasti, be-sabri, qanaat ki kami, kaj-akhlaqi, khwahish-e-nafs ki frawani, asabiyat ke ghalba, hawa-o-hawas ki pairwi, hidayat ki khilaf-warzi, khwab-e-ghaflat (ki madhoshi) aur takalluf-pasandi se; neez baatil ko haq par tarjeeh dene, gunahon par israr karne, masiyat ko haqeer aur itaat ko azeem samajhne, doulat-mandon ke se tafaakhur, muhtajon ki tahqeer aur apne zir-e-daston ki buri nigah-dasht aur jo hum se bhalayi kare us ki nashukri se; aur is se ke hum kisi zalim ki madad karein aur museebat-zada ko nazar-andaz karein ya us cheez ka qasd karein jis ka humein haq nahi ya deen mein na-jane boojhe dakhl dein. Aur hum tujh se panah mangte hain is baat se ke kisi ko faraib dene ka qasd karein ya apne aamal par nazan hon aur apni umeedo ka daman phailayein.

Aur hum tujh se panah mangte hain bad-batini aur chhote gunahon ko haqeer tasawwur karne aur is baat se ke shaitan hum par ghalba haasil kar le jaye ya zamana hum ko museebat mein dale ya farmanrawa apne mazalim ka nishana banaye. Aur hum tujh se panah mangte hain fuzool-kharchi mein padne, aur hasb-e-zaroorat rizq ke na milne se. Aur hum tujh se panah mangte hain dushmanon ki shamatat, hum-chashmon ki ehtiyaj, sakhti mein zindagi basar karne aur tosha-e-akhirat ke baghair mar jaane se; aur tujh se panah mangte hain bade taasuf, badi museebat, bad-tareen bad-bakhti, bure anjam, sawab se mahroomi aur azab ke warid hone se. Ae Allah! Muhammad aur un ki Aal par rehmat nazil farma aur apni rehmat ke sadqe mein mujhe aur tamam momineen-o-mominat ko in sab buraiyon se panah day. Ae tamam reham karne walon mein sab se zyada reham karne wale.