اے سب سے زیادہ دیکھنے والے

اور اے سب سے زیادہ سننے والے

اور سب سے تیز تر حساب لینے والے

اور سب سے زیادہ رحم کرنے والے۔

اللہ میرا رب ہے میں کسی کو اس کا شریک نہیں بناتا

میرا بھروسہ اس زندہ پر ہے جسے موت نہیں ۔

پروردگار میں تجھ سے سوال کرتا ہوں

کہ تیرے ہی لیے حمد ہے، تیرے علاوہ کوئی خدا نہیں ہے۔

تو آسمان و زمین کا پیدا کرنے والا ہے۔

صاحبِ جلال و اکرام ہے۔

محمدؐ و آل محمدؐ پر رحمت نازل فرما

اور میں جس پریشانی میں ہوں اس سے مجھے نجات عطا فرما۔

اے معبود! حق یہ ہے کہ تیری مدد کرنے والا کوئی نہیں

اور تو وہ ہے جو ہر ایک کی مدد کرتا ہے اپنی مخلوق میں سے

پس میری مدد فرما فلاں فلاں امر میں

اے ہر چیز سے کفایت کرنے والے

اور کوئی چیز تیری کفایت نہیں کرتی

اور جوآسمانوں اور زمینوں میں ہے

میری کفایت فرما ہر اندیشے میں جو دنیا و آخرت کے بارے میں ہے

اور رحمت کر محمدؐ اور ان کی آلؑ پر ۔

میں اللہ ہی کے ذریعہ کامیابی

اور کشائش احوال چاہتا ہوں۔

محمدؐ مصطفیٰ کے وسیلہ سے اس کی طرف متوجہ ہوں۔

خدایا اس صعوبت کو میرے لیے آسان کردے،

اس دشواری کو سہل بنادے

اس لیے کہ تو جو چاہے وہ کرسکتا ہے۔

اور کل کا کل دفتر تیرے ہی پاس ہے۔

میرے لیے وہ اللہ کافی ہے

جس کے علاوہ کوئی خدا نہیں۔ میرا اسی پر اعتماد ہے۔

وہی عرشِ عظیم کا مالک ہے

اسی کی طاقت اسی کی قوّت سے

میں ہر ایک کی قوّت و طاقت سے حفاظت چاہتا ہوں۔

وہ صبح کا پیدا کرنے والا ہے۔

اس کے ذریعہ ہر مخلوق کے شر سے نجات چاہتا ہوں۔

اور نہیں کوئی طاقت وقوت مگر جوخدا سے ہے ۔

خدایا محمدؐ و آل محمدؐ پر رحمت نازل فرما۔ مجھے معاف فرما مجھ پر مہربانی فرما، میرے عمل کو پاکیزہ بنادے میری بازگشت کو آسان بنادے ۔ میرے دل کی ہدایت فرما۔ مجھے خوف میں امن، عمر میں عافیت عطا فرما میری حجّت کو ثابت فرما، میری خطاؤں کو بخش دے میرے چہرے کو روشن بنا دے، میرے دین کو محفوظ بنادے میرے مطالب کو آسان کر دے ، میرے رزق میں وسعت عطافرما کہ میں کمزور ہوں ، میری برائیوں سے درگزر فرما اپنے کرم کی بنیاد پر مجھے کسی درد و رنج میں مبتلا نہ کرنا ۔ خدایا مجھے ایک ایسی نگاہ کرم عنایت فرما دے جس سے تمام بلائیں دور ہو جائیں اور ہر مصیبت دور ہوجائے اس لیے کہ میری قوّت بہت کمزور ہے۔ میرے پاس کوئی چارۂ کار نہیں ہے ان مخلوقات سے میری اُمید قطع ہوچکی ہے اب صرف تیری اُمید ہے، تجھ ہی پر بھروسہ ہے اور تیرے پاس اتنی قدرت ہے کہ تو رحم بھی کرسکتا ہے، معاف بھی کر سکتا ہے جس طریقے سے تو عذاب بھی کر سکتا ہے اور بلاؤں میں مبتلا بھی کر سکتا ہے۔ خدایا تیرے انعام کی امید ہے جو مجھ میں طاقت پیدا کرتی ہے اس لیے کہ میں روز اوّل سے آج تک تیری امید سے خالی نہیں ہوا۔ تو ہی میرا پروردگار، میرا مالک میرا ملجا و مأوا، میرا حفاظت کرنے والا اور میرا دفاع کرنے والا اور مجھ پر مہربانی کرنے والا اور میرے رزق کا ذمّہ دار ہے۔ جو کچھ میرے پاس ہے سب کچھ تیرے قضا و قدر کا نتیجہ ہے۔ لہٰذا اے میرے پروردگار اب جو تو نے میرے حق میں فیصلہ کیا ہے اس میں ایک فیصلہ یہ بھی قرار دے کہ مجھے تمام مصیبتوں سے نجات عطا فرما، مجھے عافیت عنایت فرما اس لیے کہ میں تیرے علاوہ کوئی سہارا نہیں پاتا اور تیرے علاوہ کسی پر اعتماد نہیں کرتا ۔ اے صاحب جلال و اکرام جیسا میں تیرے بارے میں سوچتا ہوں اور میں امید رکھتا ہوں ویسا ہی پورا کردے ۔ میرے بے چارگی پر میری کمزوری پر میرے خون پر رحم فرما، مجھ پر اور ہم دعا کرنے والے پر احسان فرما اے ارحم الراحمین محمدؐ و آل محمدؐ پر رحمت نازل فرما۔